BUTUAN CITY – Hingpit nang gitaktak sa serbisyo sa National Police Commission (NAPOLCOM) ang police vlogger nga si Patrolman Francis Steve Fontillas.
Subay sa en banc decision sa NAPOLCOM, napamatud-ang guilty si Fontillas sa kasong grave misconduct, conduct unbecoming of a police officer, ug disloyalty to the government.
Gawas sa pagkataktak sa serbisyo, gipahamtangan usab ang kanhi police og accessory penalty nga perpetual disqualification sa public service.
Sumala ni NAPOLCOM Vice Chairman ug Executive Officer Rafael Vicente Calinisan, unanimous ang gipakanaug nga desisyon sa en banc.
Kahinumduman nga nahimong kontrobersyal ang maong police vlogger tungod sa nag-viral niining post sa social media nga gabatikos sa Philippine National Police ug kang Pangulong Ferdinand Marcos Jr. human gi-aresto sa International Criminal Court si kanhi Pangulong Rodrigo Duterte.
Una nang gidawat sa Quezon City Police District ang pag-resign sa katungdanan Fontillas sa PNP niadtong Abril 10.
