BUTUAN CITY- Gi-relieve na sa puwesto ang pulis nga nisikat human nakababag sa agianan sa usa ka fire truck sa Marikina City.
Bisan pa nga nakab-ot na og kasabutan sa tag-iya sa emergency volunteer vehicle, gipahibalo sa Marikina City Police nga temporaryo siyang girelieveug gibalhin sa lain nga assignment samtang padayon ang imbestigasyon.
Sumala sa pahayag ni Police Colonel Jenny DC Tecson, officer-in-charge sa Marikina City Police, ang pulis gibalhin sa Sub-Station ug human niini gidesignar sa Station Headquarters Support Unit (SHSU).
Gidirekta usab siya nga magsumite og sinulat nga eksplanasyon aron masuta kung adunay igo nga basihanan alang sa posible nga pre-charge, bisan pa nga adunay kasabutan nga naabot sa duha ka partido.
Ang Land Transportation Office (LTO) nagpagawas og show cause order batok sa pulis, ingon man sa tag-iya ug drayber sa fire truck, human sa insidente nga nisikat sa social media.
Gihulagway sa Marikina City Police ang tensyon nga resulta sa kasaypanan sa pagsabot tali sa pulis ug sa drayber sa truck.
Sa ulahi, nagkauyon ang duha ka partido nga tapuson na ang isyu ug nangayo nga tangtangon ang mga post nga may kalabotan sa video.
Bisan pa niini, gipasiugda sa LTO ang importansya nga ang mga emergency vehicle dili gyud babag-on sa bisan unsang paagi nga makakompromiso sa ilang katungdanan.
