BUTUAN CITY – Wala tuguti sa International Criminal Court (ICC) pre-trial chamber ang hangyo sa legal team ni kanhi Presidente Rodrigo Duterte nga limitahan ra ang victim verification process sa nagpadayong imbistigasyon kalabot sa war on drugs niini.
Sa desisyon nga gipagawas niadtong Abril 17, gitugotan sa ICC Pre-Trial Chamber I, ang rekomendasyon sa ICC Registry nga dawaton ang lain-laing matang sa government-issued IDs sama sa birth certificates, senior citizen cards, barangay certificates, driver’s license, ug uban pa — dili lang pasaporte o National ID nga maoy hangyo sa kampo ni Duterte.
Sumala sa abogado ni Duterte nga si Nicholas Kaufman, kinahanglang hugtan ang mga rekisitos aron malikayan ang pagpanglimbong ug sipyat sa identity sa mga witnesses, apan babag ang mga abogado sa mga biktima ug gitawag ang maong proposal nga anti-poor.
Sumala sa ICC, ang kasamtangan nga proseso sa pag-verify igo na aron masiguro ang identity sa mga biktima ug malikayan ang pagpanglimbong.
Samtang, nagtakda usab kini og tagal sa prosekusyon hangtud lang sa Hulyo 1 aron isubmite ang tanang ebidensiya nga ipresentar sa confirmation-of-charges hearing nga gikatakda sa Septembre 23, ning tuiga.
Gilangkuban kini sa testimonya sa mga saksi, video ug audio recording, ug kapin sa 9,000 ka palid sa mga dokumento.
Kahinumduman nga nag-atubang si Duterte og kasong crimes against humanity kalabot sa 43 ka gika-ingong extrajudicial killings gikan niadtong 2011 hangtod 2019, lakip na ang mga insidente niadtong siya pa ang mayor sa Davao City.
