BUTUAN CITY – Andam na ang seguridad alang sa pagbisita ni Besi Presidente Sara Duterte dinhe sa rehiyon sa Caraga karung adlawa hangtud ugma.
Sigon ni Police Major Jennifer Ometer, tigpamaba sa Police Regional Office-13, duna’y gipahigayong coordination meeting kagahapon sa hapon alang sa security preparation sa paghidangat sa ikaduhang pangulo sa nasud.
Gipaneguro niini nga dunay seguridad nga ihatag sukad sa pag-abot ni Vice President Sara hangtud na sa mga lugar nga adtoan niin dayong panghinaot nga walay mga kakulian sa pagbisita sa ikaduhang pangulo.
Gibutyag usab ni Major Ometer nga ang presensiya ni VP Sara sa Caraga dunay kalambigitan sa iyang posisyon isip secretary pa gihapon sa Department of Education tungod kay siya paman gihapon ang secretary hangtud sa Hulyo 19.
Pangunahan niini ang paglusad sa Go Negosyo Youthpreneur samtang mobisita usab sa mga tunghaan sa Sta. Cruz Elementary School sa Barangay Manila De Bugabos, Butuan City og Salvacion Central Elementary School sa Barangay Salvacion, Bayugan City.
Makita usab ang besi presidente sa Lope Asis Memorial Gymnasium sa Poblacion, Bayugan City.
