BUTUAN CITY – Misibat si Tagbina, Surigao del Sur Vice Mayor Antonio ‘Tony’ Adlao gikan sa iyang mga abductors hinungdan nga nakapangayo siya og tabang sa usa ka concerned citizen kagahapon sa ala-1:50 sa kaadlawon didto sa Purok-8, Sitio Kalingayan sa Barangay Consuelo, lungsod sa Bunawan, Agusan del Sur.
Sa Facebook post sa pamilya Adlao, makita sa dagway sa besi mayor ang trauma sa iyang naagi-an kondiin nagpangilid pa ang luha sa iyang mga mata ug daw na-shock pa sa nahitabo.
Sa eksklusibong ambush interview sa Bombo Radyo Butuan, gipadayag ni Lakas-Catholic Muslim Democrats kon Lakas-CMD secretary general ug Surigao del Sur 1st district Rep. Prospero Pichay Jr. nga wala nila gipadako ang maong hitabo human nawala si Adlao tungod kay gusto nilang imbestigahan kini og maayo sa kapulisan aron dili sila madudahang namulitika ilabina nga seryusong alegasyon ang kidnapping.
Hangtud nga kagahapon sa kaadlawon, nakadawat na lang og tawag ang kapulisan Bunawan, Agusan del Sur kalabot sa tawong nangayo og tabang ug nasutang mao na kini ang nawalang opisyal kinsa misibat matud pa gikan sa iyang mga abductors tungod kay gitu-uhan niining patyon siya.
