BUTUAN CITY – Padayon karun ang gihimong debriefing ngadto kang Tagbina, Surigao Del Sur Vice Mayor Antonio ‘Tony’ Adlao human kini hingpit nga naturn-over ngadto sa Surigao Del Sur Police Provincial Office.
Kini ang pagkumpirma ni PMaj. Dorothy Tumulak, tigpamaba sa Police Regional Office kon PRO-13.
Nasayran nga si Vice Mayor Adlao kansa midagan pagka-mayor, gikatahong nawala niadto pang biernes, Marso 25, og nakit-an sa lungsod sa Bunawan, Agusan Del Sur kagahapon lang.
Sigon ni Pmaj. Tumulak nga bandang alas 1:50 kaganinang buntag sa dihang nakadawat ang Bunawan Municipal Police Station og taho gikan sa concerned citizen mahitungod sa tawo nga nangayu og tabang sa may Purok-8, Kalingayan sa Barangay Consuelo, Bunawan, Agusan Del Sur rasong daling girespondihan og hingpit nga narekober.
Hinoon sa inisyal nga taho, anaa sa maayong panglawas ang besi mayor samtang padayon ang gihimong lawom nga imbestigasyon aron masayran ang hinungdan sa pagka-missing niini.
Gi-angkon usab sa opisyal nga ang lungsod sa Tagbina, Surigao Del Sur mao ang usa sa mga lugar nga gitutukan sa kapulisan sa hisgutanang seguridad alang sa nagkadool nga piniliay.
Kini tungod sa init nga dagan sa pulitika gawas pa sa presensiya sa insurhensiya.
