BUTUAN CITY – Giplastar na sa probinsyal nga kagamhanan sa Agusan del Norte ang ilang vaccination plan kondiin gi-identify nila ang mga vaccination centers sa matag-lungsod dungan sa pag-andam usab sa mga storage facilities ug ubang mga logistical supports gawas pa sa mas gipaspasan nilang information drive kalabot sa maong programa.
Sa eksklusibong pakighinabi sa Bombo Radyo Butuan, gipadayag ni Agusan del Norte Governor Dale Corvera nga ang kalampusan sa kampanya sa nasudnong kagamhanan, mag-agad usab sa kalampusan sa mga LGUs pagpatuman niini.
Sa pagkakaron, blangko pa ang opisyal kung pila gyod ang ihap sa mga bakunang igahin sa nasudnong kagamhanan dinhi sa lalawigan apan gipasaligan matud pa ang probinsya nga hatagan og 70-porsiento sa kinatibuk-ang gi-require nga populasyon.
Kung makuwang ang ihatag sa nasudnong kagamhanan, mupalit usab ang provincial government rason nga duna’y mga programa kansang pundo, ire-align aron lang ma-una ang pag-purchase sa mga bakuna.
Alang unya sa pagsugod na sa vaccination program, gitunga sa duhaka cluster ang lalawigan kondiin ang unang cluster mao kadtong mga lungsod nga gikan sa Kitcharao lahos na sa Cabadbaran City samtang ang ikaduhang cluster, maggikan sa provincial head office ngadto na sa Carmen ug Las Nieves.
Sigon sa opisyal, ang matag-lungsod, gahinan og usa ka milyon ka pesos isip logistical support sa ilang mga vaccination centers.
Kini gawas pa sa pagbutangan og storage facilities aron masigurong dili muhupas ang bakuna kung makuwangan sa gikinahanglang temperatura.
