BUTUAN CITY – Gikumpirma ni P/Insp. Antonio Kayasa – OIC sa Kitcharao Municipal Police Station sa Agusan del Norte Police Provincial Office nga ila nang gi-dismiss si PO2 Larry Precioso.
Kini base na usab sa gipakanaog nga kamanduan sa ilang mga kadagkuan sa Police Regional Office kon PRO-13 human usab niini nadawat ang dismissal order gikan sa Office of the Ombudsman ning mi-aging semana.
Sigon ni Insp. Kayasa, ila gilayong gidis-armahan si Precioso, gibawi-an sa iyang PNP bag og ID hinungdan nga usa na siya karon ka yanong sibilyan.
Dawat matud pa ni Precioso ang maong desisyon bisan og onse ka tuig na kining nagserbisyo sa han-ay sa kapulisan.
Samtang si PO2 Daryle Alonzo, atua na nadestino sa Cabadbaran City Police Station kinsa gibalhin gilayon og assignment human napasakaan og kaso tungod sa maong hitabo.
Mahinumdumang niadtong Oktubre 18, 2016 sa alas-5:30 sa hapon dihang gilusad sa maong mga pulis ang operasyon batuk sa nakamotorsiklong si Expedito Melencion, 35-anyos, residente sa Purok 5, Brgy. Sta. Ana sa lungsod sa Tubay, Agusan del Norte kondiin nakuhaan pa nila kini og tulo ka sachets sa shabu.
Sigon sa igsoon sa biktimang si Marlou, biktima sa mistaken identity ang iyang igsoon tungod kay ang subject matud pa sa ilang operasyon nga na-ilang si alyas ‘Long Hair’, 28-anyos, susama man sa biktima nga duna’y taas nga buhok.
Sa reklamong gipa-abot ni Marlou sa NBI, gipadayag niining ang shabu nga nakuha gikan sa posisyon sa iyang igsoon, planted tungod kay wala matud pa kini’y kakapas nga makig-transact tungod sa estado sa iyang pangisip hinungdan nga gipasakaan nila og mga kasong murder, grave misconduct, abuse of authority og conduct prejudicial to the best interest of the service ang maong mga pulis. (Beth Ruiz)
