Usa ka sapa sa Butuan City nga gihimong flowing pool sa kapulisan, gidayo

BUTUAN CITY – Gituyo matud pa pagmugna alang sa mga kabataan ang gihimong swimming pool sa detachment sa mga kapulisan sa may Brgy. Bonbon ning syudad sa Butuan.
Sa pakighinabi ning sibyahan, gibutyag ni PO1 Maribel Baluas, sa 1304th Maneuver Company, Regional Mobile Force Battalion 13, nga kaniadto palang nakita na nilang adunay potential nga himuong ligoanan ang maong lugar tungod sa flowing water niini sa sapa nga gikan pa sa bukid.
Sigon niini, nga niadtong unang semana sa buwan sa Marso nila gisugdan ang nasangpit nga inisyatiba nga I-develop ang maong lugar pinaagi sa paghimo niini nga ligoanan ingon man attraction sa mga lumalabay.
Matud pa nga ila kining gihimo aron usab nga mahilikay ang mga kabataan sa computer games ug sa mga ginadiling binuhatan.
Subay niini, gimonitor matud pa nila ang kalimpiyo sa maong ligoanan ug adunay magbantay usab nga mga nakaduty nga mga pulis.
Gawas niini, nagbutang usab sila ug mga salbabida ug floaters aron nga luwas ang mangaligo sa maong ligoanan.
Libre usab kini alang sa tanang gustong magpabugnaw ning panahon karon sa summer basta kay likayan lang ang paglabay ug basura sa bisan asa ug ginadid-an usab ang pagsulod sa kampo ang mga nangaligo alang sa hisgutanang pangseguridad. (Mon Aplaya)