BUTUAN CITY- Subling nakatala og binakbakay tali sa kasundaluhan sa 30th Infantry (Fight On) Battalion, Philippine Army ug mga miyembro sa teroristang grupong New People’s Army o NPA ning miaging mga adlaw sa bukirang bahin sa Brgy. Budlingin, Alegria, Surigao del Norte.
Madumduman nga nadatong Pebrero 8 dunay natigayong engkwentro tali sa kasundaluhan ug NPA kondiin namatay ang usa ka myembro sa NPA nga gi-ilang si Narciso Suazo alyas Wolf, samtang subling nawad-an na usab ang walhong grupo og usa ka myembro human mi-ulbo ang pagbinaylu-ay og bala tali sa tropa militar ug gihiusang pwersa sa Guerilla Front (GF) 16C1 nga gipangunahan ni Roel Neniel o mas nailang si Alyas Jacob ug GF 16C2 nga gipangunahan ni Alberto Castañeda nga mas nailang si Alyas J.D.
Nahitabo ang engkwentro human gipadayun sa kasundaluhan sa 30IB ang pag-gukod sa ilang mga naka–away niadtong Pebrero 8 aron protektahan ang mga komunidad gikan sa pang-abuso sa armadong grupo.
Natud-an nila ang mi-ikyas nga mga rebelde ug subling nagkabinay-lu-ay og bala nga miresulta usab sa pagka-kumpiska sa mga kagamitang pang-gubat sama sa usa ka IED nga dunay kalakip nga Detonating device, Blasting Cap, magazines alang sa M16 rifle, bandolier,bala sa M16 ug AK47, medisina, subersibong dokumento, pagkaon ug uban pang personal nga kagamitan. Sa karun ang namatay nga NPA giilang si Ricky Vocales Rosaldo alyas Kenz, miyembro sa Platoon 16C1, GFC16, NEMRC diin temporaryong gipahiluna sa Gades Funeral Homes sa Brgy Pongtud, Alegria, Surigao Del Norte.
Subli usab nga nagpadayag sa iyang pagpasalamat si LTC RYAN CHARLES CALLANTA, ang commander sa 30IB sa mga maisogong kasundaluhan sa padayong paghimo sa ilang gipanumpaang katungdanan.
Padayon usab nga nanawagan si LTC Callanta sa mga nahabiling aktibong miyembro sa NPA nga mubalik na sa ilang mga pamilya ug magbag-o sa kinabuhi adesir pa maulahi ang tanan.
