BUTUAN CITY – Usa ka sales company sa Guizhou, China, ang gi-atake karon sa mga netizens tungod sa pagpugos sa ilang mga empleyado pagkaon og buhi nga pantat og pag-inom og dugo sa manok higayong dili nila makab-ot ang ilang target goals.
Daling gibatikos ang pinasahing silot sa mga empleyado sa Guizhou construction material store human nag-viral ang video sa maong binuhatan.
Nagpakita kini sa usa ka lalaki nga nanghatag og pantat gikan sa usa ka plastic bucket ngadto sa daghang empleyado dayong mando kanila nga ingkiton kini hangtud nga matunga.
Makita usab sa maong video ang ubang empleyado nga gipa-inom og dugo sa manok bisan og wala na magkadimao ang ilang nawong tungod sa kaluod.
Gi-angkon sa usa ka representante sa construction material super-store ang maong hitabo nga gilambigitan sa 20 ka mga empleyado ng wala makakuha sa ilang sales quotas.
Apan giklaro niini nga boluntaryo ang paghimo sa maong mga empleyado niini isip usa ka klase sa motibasyon aron ayuhon pa ang ilang performance.
Human nag-viral ang maong video, gi-imbestigahan gilayon sa local labour department ang maong insidente.
