BUTUAN CITY – Misamot karon ang mga pagbatikos nga nadawat ni United States President Joe Biden human ang usa ka oras niya nga news conference kondiin ang mga isyu wala lang nakasentro sa iyang edad.
Gipadayag niini nga anaa siya sa maayong panglawas ug siya ang pinakamaayong kandidato nga makapildi kang Donald Trump.
‘I am the best qualified person’.
US President Joe Biden
Hugot usab nga gibarugan sa presidente sa pinasahi nga solo appearance niini atubangan sa mga reporters, nga kinahanglan niyang tapuson ang iyang trabaho, taliwa sa balik-balik nga mga pangutana kalabot sa krisis nga mihabol karon sa iyang kandidatura.
Ang maong news conference nabhiran usab og pipila ka mga sayop sa iyang mga gipangsulti apil na niini ang sayop nga pagtawag niya kang Vice-President Kamala Harris kinsa natawag niyang Vice-President Trump.
Una nang nasayop ang presidente dihang sa iyang pag-introduce kang Ukrainian President Volodymyr Zelensky, iya kining gitawag nga President Putin atol sa usa ka NATO event.
Sa pagkakaron, nadugangan pa ang mga membro sa iyang kaugalingong Democratic Party ang nanawagan kaniya nga mu-atras na human ang minos niining debate performance ning mi-aging buwan.
