BUTUAN CITY – Wala hingpit nga gipanghimakak sa United States Department of Defense (DoD) ang taho nga nalambigit sila sa pagpakaylap sa mga trolls aron gub-on ang COVID-19 vaccine sa China nga Sinovac alang sa Pilipinas atol sa peak sa COVID-19 pandemic.
Ang gikumpirma sa US DoD, mao nga migamit sila og lapad nga coverage sa mga operasyon apil ang operations in the information environment kon OIE aron mabatukan ang dautang impluwensiya sa mga kaaway.
Ang OIE, usa ka maneuver doctrine sa US military alang sa ilang strategic information warfare.
Gipasabot ni DoD spokesperson Lisa Lawrence nga ang China ang nagsugod sa disinformation campaign aron basulon ang US sa pagkaylap sa COVID-19.
Gibutyag usab sa US official nga pipila ka mga state ug non-state actors ang migamit sa social media platforms ug uban pang media aron mapakaylap ang sayop nga impormasyon ug makahimo og malign influence campaign batuk sa Estados Unidos.
Kini ang hinungdan nga migamit ang DoD og nagkada-iyang platforms sama sa social media aron mabatukan ang mga pag-atake sa China ngadto US, apil na sa ilang partners ug mga kaalyadong nasud sama sa Pilipinas.
