BUTUAN CITY – Gilantaw karun sa United Kingdom ang “tanang posibleng paagi” , lakip na ang pakigtambayayong sa United States ug sa ilang mga kaalyado aron mapanalipdan ang mga importanteng ruta sa pagpadala sa lana nga moagi sa Strait of Hormuz.
Kini ang gibutyag ni Ed Miliband, Energey Secretary sa United Kingdom human usab nga gipahayag ni US President Donald Trump nga ablihan ang agianan sa “bisan unsang paagi”, ug nag-awhag sa mga nasod sama sa UK, China, ug France nga magpadala og mga barkong pang-giyera ngadto sa maong dagat.
Sumala pa ni Miliband nag “importante kaayo” nga mahimong luwas ang strait alang sa mga barko, apan wala siya naghatag og detalye sa mga plano o opsyon nga ginahuna-huna sa gobyerno.
Ang epektibong pagharang sa Iran sa strait , usa sa pinakaimportanteng agianan sa mga barko sa kalibotan, nakahatag og grabe nga epekto sa global supply chains ug sa presyo sa enerhiya.
Sumala sa usa ka pamahayag gikan sa bag-ong Supreme Leader sa Iran nga si Mojtaba Khamenei, padayon nga babagan sa Iran ang strait isip pampulitika ug pang-ekonomiyang pressure batok sa US.
Samtang ang gubat tali sa US ug Israel batok sa Iran misulod na sa ikatulong semana, giingong daghang barko ang giatake samtang naningkamot nga moagi sa strait, diin mga 20% sa lana sa kalibotan kasagaran moagi.
Aduna usab kabala-ka nga ang Iran nagbutang og mga mines sa agianan isip kabahin sa ilang paningkamot sa pagpugong sa pagbiyahe sa mga barko.
