BUTUAN CITY – Gikansela na ang usa sa mga undercard bouts sa Pacman-Broner fight partikular ang away sa Agusanon nga si Genesis Libranza batuk sa Nicaraguan boxer nga si Carlos Buitrago tungod sa pagsobra ni Buitrago sa weight limit alang sa lighytweight division.
Sa eksklusibong pakighinabi sa Bombo Radyo Butuan, gipadayag ni Jim Libranza, manghod sa 25-anyos nga si Genesis, parehong taga-Brgy. Calibunan, Cabadbaran City, lalawigan sa Agusan del Norte, pasok sa weigh-in ang iyang maguwang human mitimbang sa 115-libras apan misobra ngadto sa 121-libras ang timbang sa Nicaraguan boxer.
Sa ilang katapusang pakighinabi sa iyang maguwang human sa weigh-in, gibutyag ni Jim nga andam unta gihapon awayon sa iyang kuya ang iyang kaaway ibabaw sa ring apan wala kini gitugot sa boxing commission sa Las Vegas, Nevada.
Gidugang ni Jim nga tune-up fight lang unta ang matigayon alang sa walo ka rounds nilang away.
Alayon niini, magpabilin gihapon sa Los Angeles, California ang iyang maguwang tungod kay bansayon pa man siya ni coach Freddie Roach alang sa iyang umalabot nga away karong Pebrero 9.
Bisan og dili na ubos sa MP Productions ang iyang umalabot nga away apan dakong puntos gihapon kini sa boxing career ni Genesis sa rasong usa gihapon kini ka international fight. (Beth Ruiz)
