BUTUAN CITY- Nahimong hapsay ang pagsugod kagahapong adlawa sa unang adlaw sa Filing of Certificate of Candidacy (COC) sa tibuok Lalawigan sa Surigao del Sur alang sa 2022 Elections.
Sa pakighinabi ning sibyahan kang Atty. Ernie Palanan ang provincial election officer sa Surigao del Sur, gipadayag niining plastado ug hapsay ang unang adlawa sa filing sa COC sa mga gustong magpapili nga opisyal sa maong lalawigan.
Sumala ni Atty. Ernie Palanan nga sa intero Surigao del Sur nakalista na sila og lima ka mayor, unom ka bise mayor,13 ka SB member nga lalaki ug walo ka SB Member nga babae nga magpapili alang sa umaabot nga election sunod tuig diin lakip matod pa sa maong ihap ang usa ka team nga nakapasa na og COC gikan sa lungsod sa Cantilan ug Bislig City.
Sigon ni Atty. Palanan kung lantawon sa kinatibuk-an ,mingaw ang unang adlaw sa filing kung itandi sa nakalabay nga katuigan, butang nga gilauman na usab matod pa sa opisyal tungod na usab sa mga limitadong paglihok-lihok karon sa mga tawo.
Samtang hugot usab gipatuman ang mga health protocols sa pagsulod pa lang sa opisina sa mga buhatan sa Comelec sa maong probinsya.
Adunay mga gibutang nga disinfectants sa mga entry points samtang gipasulat usab og health declaration form ang tanang adunay transaksiyon sa nasangpit nga buhatan.
