BUTUAN CITY – Nagpahayag og dakong kabalaka ang United Nations sa grabeng kadaot ug epekto sa mga tawo sa Lebanon tungod sa padayon nga pag-atake sa Israel.
Sumala sa United Nations High Commissioner for Refugees (UNHCR), ang pagpalapad ug pagpakusog sa mga opensiba sa Israel maoy hinungdan sa pagdaghan sa mga sibilyan nga napugos og biya sa ilang mga pinuy-anan.
Mikabat na sa kapin 1.2 milyon ka mga tawo ang napugos og biya gikan sa ilang mga balay sukad gisugdan sa Israel ang pag-atake sa Lebanon.
Matod pa, samtang milabay ang mga adlaw, padayon usab nga misaka ang ihap sa mga residente nga mibiya.
Nagkakulang na usab ang mga temporaryong puy-anan alang sa mga evacuees tungod sa nagpadayon nga kagubot.
Mahinumduman nga gipakusgan sa Israel ang pag-atake sa Lebanon human magpalupad og mga missile ang Hezbollah gikan sa Lebanon, nga nasundan sa hiniusang opensiba sa Israel ug United States batok sa Iran.
