BUTUAN CITY – Mu-abot sa kapin 1.3-milyones pesos ang pyansang girekomenda sa korte aron temporaryong makagawas ang nabalhog sa bilangguan nga usa ka magtutudlo sa sekondaryang tunghaan sa Bayugan City, Agusan del Sur human nalutsan og warrant of arrest tungod sa siyam ka ihap sa kasong pagpamolestiya sa pipila ka mga magtutunghang lalaki kon paglapas sa Section 5. Article III sa Republic Act 7610.
Naila ni P/Sr. Insp. Ronald Baeño – hepe sa Veruela Municipal Police Station, ang suspek nga si Ramil Silao Dologmanding, 42-anyos, ulitawo og residente sa Purok-1, Brgy. Sampaguita, sa lungsod sa Veruela, Agusan del Sur.
Gibutyag sa opisyal nga gi-isyu ang arrest warrant sa RTC 10th Judicial Region, Branch 55, nga nakabase sa lungsod sa Trento, Agusan del Sur og pinirmahan ni Executive Judge Lou Nueva.
Nadakpan siya pasado alas-9:10 kagahapon sa buntag sulod sa iyang mismong pinuy-anan kansa gituyo sa mga otoridad aron dili mabalda ang klase sa tunghaan diin kini nagtudlo. (Beth Ruiz)
