BUTUAN CITY – Padayon pa ang imbestigasyon sa Butuan City Police Station kon BCPS2 aron matumbok ang responsable ug ang motibo sa pagpamusil-patay sa Purok 1, R Calo St., Brgy. 17, Fort Poyohon ning siyudad sa Butuan pasado alas-6:00 kagabii.
Sa pakighinabi sa Bombo Radyo Butuan, gi-ila ni Butuan City Police Office kon BCPO spokesperson Anne Cubio ang biktimang si Jonathan Biating Lincona, 29-anyos, ulitawo ug residente sa Emenville Subd., sa Brgy. Ambago, ning siyudad kinsa gidala pa sa ospital apan gideklarang dead on arrival sa attending physician.
Migawas sa inisyal nga imbestigasyon nga samtang nagmaneho ang biktima sa iyang motorsiklo uban ang duha ka mga back riders, mitapad ang riding-in-tandem suspects ug gipusil ang biktima sa maka-upat ka higayon dayong sibat padulong sa wala pa matinong direksyon.
Narekober gikan sa crime scene ang upat ka basiyo sa bala gikan sa wala pa matinong kalibre sa armas, sling bag nga duna’y sulod nga suspected sachet of shabu nga gibana-banang mitimbang og 60-gramos nga nagkantidad og P400,000.00 ingon man digital weighing scale ug salaping cash.
Samtang didto sa ospital, narekober sa kapulisan ang wala pa matinong kalibre sa pistola nga gi-tuck in sa hawakan sa biktima ug unom ka mga buhing bala sulod sa bulsa sa iyang jacket.
Nakig-alayon na sila sa mga barangay officials aron matan-aw ang CCTV footage alang sa posibleng pag-ila sa mga responsable.
