BUTUAN CITY – Dili pa gihapon madawat sa pamilya Monterde sa Purok-6 Barangay Rizal Buenavista, Agusan del Norte ang talagsaong panghitabo sa ilang kinabuhi human namatay ang ilang anak tungod kay gikuha matud pa kini sa engkatandang gipanganlan og Prinsesa Liwayway.
Naila ang mitaliwan nga si Jose Monterde Jr. kon naila sa ang-ga nga Jay-R, kinsa namatay niadtong Septembre 26, ang petsang gi-target matud pa nga kuhaon siya sa gika-ingong prinsesang engkantada nga misaad nang kuhaon siya sukad niadtong anaa pa siya sa sabakan sa iyang inahang si Merlyn,
Sa eksklusibong pakighinabi sa Bombo Radyo Butuan, gipadayag ni Nanay Merlyn nga hangtod karon, dili pa gihapon sila makatuo sa nadangatan sa iyang anak kinsa sukad sa gamay pa kini, makakita na og mga dili ingon nato.
Sumala niini, matingala sila tungod kay mahilig magduwa kaniadto si Jay-R sa ngitngit kondiin kanunay pa niining ibutyag nga hayag ang palibot taliwa nga gabii na.
Ila na kining gipahiling sa tambalan tungod kay kanunay matud pang magpakita kaniya ang gika-ingong prinsesang engkantada nga ginganlan og Liwayway niadtong nag-edad na kini og 13-anyos rason nga giritwalan siya sa mananambal aron dili kini makaduol kaniya dungan sa pagbahad nga dili mutabok og dagat aron dili mawala ang epekto sa ritwal.
Ulahi na niyang nasayran pinaagi sa iyang mga pag-umangkon nga maoy sumbungan ni Jay-R nga daan na kining gibaharan sa engkantada nga musugot man kini o dili, kuhaon siya sa edad nga 26-anyos ug sa petsa 26 usab.
Apan niadtong Agusto 17 ug 18 ning tuiga, mitabok matud pa kini sa isla sa Lianga, Surigao del Sur ka-uban ang hinigugma human gi-imbitar sa iyang ka-ubanan sa trabaho og gibalewala ang tambag nilang mga ginikanan nga dili mudayon tungod kay layo ang maong dapit ug wala kini masuhito.
Mipadayon matud pa si Jay-R ug human naka-uli, mibalik na usab sa unang mga semana niadtong Septembre hangtud nga dinhi na nagluya ang iyang lawas ug kanunay na matud pang magpangutana kaniya kung unsa na ang petsa hangtud nga namatay kini sa alas-tres sa kaadlawon niadtong Septembre 26.
