BUTUAN CITY – Malampuson ang gipahigayong buybust operation sa otoridad batuk sa tigpayuhot sa ginadiling druga pasado alas-7:00 kagabii sa may Purok Repolyo, Barangay Golden Ribbon ning siyudad sa Butuan, kansa usa sa mga barangay sa dakbayan nga gideklarang drug cleared.
Na-ilhan ang nadakpan nga si Dandan Ronel Martinez, 27-anyos, ulitawo ug residente sa maong dapit.
Nakuha sa posisyon sa suspek ang 9 ka sachet nga gitu-uhang shabu nga dunay market value nga 35,400-pesos lakip na niini ang buybust item nga napalit sa operatibang nagsilbing poseur buyer.
Nakumpiska usab ang 1000 nga marked money ug 3,460-pesos nga salaping cash lakip na ang cellphone niini.
Sa pakighinabi kang Golden Ribbon Brgy Kapitan Juvy Delgado, gibutyag niining gikan sa Cagayan De Oro City ang nasangpit nga suspetsado og mibalik sa barangay niadtong kapistahan ning siyudad.
Dugang pa ni Kapitan Delgado nakadawat siya ug impormasyon gikan sa iyang agent mahitungod sa binuhatan sa suspek rason sa iyang pagpatawag og sesyon kagahapon aron ila na kining aksiyunan apan na-unhan sila sa kapulisan.
Gikasuko usab sa kapitan human gidamay pa sa suspek ang iyang pangalan.
