BUTUAN CITY – Mitira na usab sa pinaka-unang higayon ang Ukraine og Storm Shadow Missiles, ang long range missile nga gikan sa United Kingdom, ngadto sa teritoryo sa Russia.
Dugang senyales na usab kini sa posisyon sa western countries nga dili direktang moapil sa maong giyera. Wala pa mikomento ang UK government sa maong taho apan gibutyag sa defence secretary nga ang pakig-giyera sa Ukraine maoy musulti sa kamatooran.
Makita ang video sa siyudad sa Maryino, gamay nga kumunidad sa Kursk region diin madungog ang daghang mga pagbusikad og makita usab ang itom nga mga aso.
Dunay migawas usab nga nadamyos nga dakbalay apan wala makita kung tungod ba kini sa maong missile.
Gitoohang ang pag-apruba nga gamiton ang maong kahimanan pang-gubat maoy tubag sa pag-deploy sa kapin 10-mil ka sundalong North Koreans sa Kursk Region kauban ang mga sundalo sa Russia, nga sumala sa UK Og US usa ka dakong escalation sa giyera.
Natigayon kini usa ka adlaw lang sa dihang nakumpirma usab nga miigo sa Russia ang gi-suplay sa US nga Army Tactical Missile System (Atacms) missiles samtang mi-apruba usab si US President Joe Biden nga mohatag sa Ukraine og anti-personnel landmines, aron mapahinay ang pag-abante sa tropa sa Russia ngadto sa Ukriane.
Nasayrang nagkara-kara ang Ukraine sa pagpangayu og permiso nga gamiton ang Storm Shadow missiles ngadto sa Russia isip suporta sa Western military samtang nabalaka usab kini ugaling makalingkod na si Donald Trump isip presidente sa US, kabhangan niini ang military og financial aid ngadto sa Ukraine.
