BUTUAN CITY – Ubay-ubay nga katawhan sa Estados Unidos ang alanganin sa kakapas ni United States President Joe Biden kung makaya pa niini ang iyang tahas higayong mudagan pa siya pagka-presidente tungod sa iyang edad nga 81-anyos.
Sa eksklusbong pakighinabi sa Bombo Radyo Butuan, gipadayag ni Bombo international correspondent Marlon Buque nga isip citizen na sa maong nasud, duha-duha na kung makaya pa ni President Biden ang sunod niyang termino.
Uyon usab siya sa sugyot sa uban nga mu-undang na lang si Biden sa iyang tinguhang subling magpapili tungod kay delikado na alang sa iyang edad ang mang posisyon ilabina kung hisgutan ang panglawas.
Aminado siyang wala’y lider nga perpekto apan mas pabor siya kang kanhi US President Donald Trump human niya nakita nga mas maayo matud pa ang ekonomiya sa ilang nasud dihang kini pa ang presidente.
Samtang sa hisgutanang padonar og bilyunes dolyares ngadto sa mga nasud nga nakasinati og giyera, gipadayag niining wala’y problema niini apan ang nakasakit kay ang ila matud pang buhis ang apil sa gigamit.
