BUTUAN CITY- Ubay-ubay nga mga hagit ang gi-atubang karon sa mga local government units sa entiro Pilipinas. Kini ang gihisgutan ni Butuan City Vice Mayor Lawrence Lemuel Fortun sa iyang pagpamulong sa national convention sa 28th Vice Mayors League of the Philippines nga gipahigayon dinhi sa dakbayan sa Butuan sugod kagahapon ug matapos ugmang adlawa.
Sigon ni Atty. Fortun, usa na niini ang paglumba nga mahimo nang ordinansa ang iduso nilang mga sugyot-balaudnon. Bisan matud pa nga duna’y higayon nga dili kini ma-aprubahan apan makonsidera gihapon kining dakong kalampusan kung mapatuman sa ubang mga lugar o kaha mahatagan og national significance.
Nanghinaut ang bise mayor nga unta, ang ingon niini nga panagtigom muresulta sa pag-umol ug paglig-on sa nasabutang legislative agenda dili lang alang sa kaayuhan sa liga kondili apil na sa mga constituents nga ilang giserbisyuhan.
Mas maayo matud pa nga pangunahan na lang sa mga hingtungdang city o kaha municipal councils ang pagduso og mga resolusyon nga makatabang sa ilang mga constituents apil na sa ilang hingtungdang lugar. Gipasigarbo usab sa opisyal ang mga tourist destinations dili lang sa dakbayan sa Butuan kondili apil na sa ubang bahin sa Caraga Region nga ilang suruyon kansa kabahin sa maong convention. (REPORTS FROM: Bombo Lilibeth Ruiz)
