BUTUAN CITY- Gipailalom na sa National Disaster Risk Reduction & Management Council kon NDRRMC ngadto sa Orange Rainfall Warning ang Dinagat Islands, Surigao del Sur, Surigao del Norte ug Agusan del Norte.
Kini tungod kay posibleng dunay peligrong hatod sa pag ulan, pagbaha ug pagdahili sa yuta.
Gani didto sa lungsod sa Cantilan Surigao del Sur, ibaha na ang ubang area human gibundakan sa kusog nga ulan kondiin lakip sa mga naapektuhan ang usa ka skwelahan sa maong lungsod ingun man ang Purok 4 Magasang, ug Purok Pag-antayan kondiin duna na’y mga residente ang gipanghikling tungod sa taas nga tubig-baha.
Samtang duna na usab natigayong landslide sa provincial road sa Purok 7 Pili, Malimono,Surigao del Norte hinungdan nga dili pa karun passable ang maong dalan gawas lamang sa mga single motor.
Lakip pa sa dili passable ang Hanagdong bridge ingun man ang Tinago river sa Malimono Surigao del Norte kondiin ubos pa sa hugot nga pagmonitor sukad kagabii human makasinati og kusog nga ulan.
Madumduman nga lakip ang probinsya sa Surigao del Sur, ug Surigao del Norte ang labing naapektuhan usab sa nakalabay nga bagyong Odette niadtong miaging tuig apan karun, subli na usab nga nakasinati og pagbaha.
Sa bahin usab sa Agusan del Norte partikular sa lungsod sa Jabonga , hinay-hinay na nga misaka ang tubig baha sa maong area.
