BUTUAN CITY – Walay kabutangan sa kalipay ug dakong garbo sa mga ginikanan sa Butuanon nga si JD ‘Maymay’ Cagulangan, human kini nahimong Most Valuable Player kon MVP sa University Athletic Association of the Philippines kon UAAP Season 87 men’s basketball finals kagabie sa Smart Araneta Coliseum.
Kini human giparot sa iyang koponan nga University of the Philippines kon UP Fighting Maroons ang De La Salle University Green Archers sa best-of-three finals sa iskor nga 66-62. Sigon ni coach Joel Cagulangan, dako kaayong garbo alang sa ilang pamilya ang nakab-ot sa iyang anak ilabina nga katapusan na kini nga tuig sa iyang pagtungha sa maong unibersidad.
Natapalan na matud pa ang sobrang kahago nga naagi-an sa iyang anak sukad pa sa pag-training niini. Nabalik-lantaw pa niya nga sukad nag-grade 6 ang iyang anak dihang gikuha sa usa ka tunghaan sa Cagayan de Oro City hangtud na sa iyang secondary school sa De La Salle University sa Greenhills, tag-duha ka buwan lang kada-tuig nila kini maka-uban.
Dako matud pa og natampo ang disiplina nga iyang gi-instill sa iyang anak nga nakadugang sa abilidad niini sa pagdula.
Gila-umang maka-uli matud pa si JD dinhi sa Butuan a Disyembre 23 higayong mahuman na ang iyang mga guestings sa mga radio ug TV stations ilabina nga duna pa’y bonfire celebration nga himuon ang UP. Sa ilang balayj matud pa Brgy.San Ignacio ning siyudad sa Butuan, mag-Pasko si JD uban sa ilang pamilya.
