BUTUAN CITY – Hilabihan ang kalipay ni Mychal Perolino human nabalik ang iyang pitaka nga natagak sa gisakyang multicab kagahapon sa udto dihang gi-uli sa mga estudyante sa senior high school sa Father Saturnino Urios University ng nakapunit niini.
Sumala ni Perolino. gikan siya sa airport og dihang mubayad na unta sila sa tricycle didto niya namatikdan nga wala na diay ang iyang pitaka.
Dako ang pagtoo niini nga sa nasakyang multicab kini nahulog hinungdang mitawag na lang kini sa iyang higala sa mga bangko nga ipa-deactivate ang iyang cards samtang miadto na usab sa LTO aron mangayo og affidavit sarang magamit sa iyang pagbiyahe dungan sa paglaum nga makita gihapon ang iyang pitaka ilabina kay duna kini contact number.
Sumala pa niini, hilabihan ang iyang kalipay ug pagpasalamat sa mga estudyante nga na-abtan pa niya dinhi sa Bombo Radyo.
Una nang midalikyat dinhi sa sibyahan bisan ug ma-late na sila sa klase ang mga estudyante nga sila Steven Lusica, Arnel Cagas, Christian Paul Singgol og Marion Jesper Marcial aron i-turn-over ang nakita nilang pitaka sulod sa multicab.
Saysay pa nila, ilang gideretso dinhi sa Bombo Radyo ang pitaka tungod sa pagsalig nga ma-contact ang tag-iya og mabalik kaniya. (Rolan Janea)
