BUTUAN CITY – Tungod sa kawala na’y laing mahuna-hunaan nga ikatabang sa usa ka grade 6 pupil nga nagpa-check up sa iyang puya pa lang nga manghod, gi-post sa netizen nga si Keiner Legazpi Espinola sa Bislig City, Surigao del Sur ang iyang nasaksihan sa iyang pagdalikyat sa Family Medical Clinic – Hospital sa Brgy. Mangagoy.
Sa iyang FB post, gisaysay niini ang grabeng kaluoy niya sa 11-anyos pa lang nga si Rhea Oraiz kinsa nagtungha sa Danipas sa Brgy. Mangagoy sakop sa maong siyudad.
Nasuta niya nga namatay ang iyang inahan ning mi-aging buwan sa pagpakatawo sa iyang manghod nga lalaki tungod sa high blood pressure.
Dinhi pa niya nasayran nga iyang gipa-check up ang iyang manghod tungod kay gi-ubo kini hangtud nga nasuta nga wala’y trabaho ang iyang amahan ug uban ra nila pagpuyo ang iyang lola.
Wala na nanguta pa og lain si Keiner tungod kay kahilakon na usab siya sa iyang nasayran ilabina nga wala usab siya’y ikatabang tungod kay wala siya’y trabaho.
Mi-apela siya sa tanan nga muhatag og gamay nga tabang sa maong bata aron mabati usab niini ang diwa sa Pasko nga mao ang paghinatagay ilabina sa labaw nga nanginahanglan.
