BUTUAN CITY – Temporaryong nawad-an og lawak ang mga magtutungha sa Grades 9 ug 10 sa Doña Telesfora National High School human nahunlak ang atop ug ang kinatibuk-ang lawak kansa nahimutang sa Brgy. Doña Telesfora, lungsod sa Tubay, Agusan Del Norte.
Natigayon kini ning nakalabay nga adlaw atol sa paghuros sa kusog nga hangin.
Nasayrang tuig 2019 pa lamang natukod ang maong mga lawak nga gama lang sa light materials sama sa nipa ug amakan ug tungod sa kakusog sa hangin ingon man pagbundak, wala kini makaya sa maong mga classrooms.
Alayon niini nanawagan og hinabang ang kadumalahan sa maong eskwelahan nga matukod gilayon ang maong mga lawak tungod kay labing apektado niini ang mga estudyante nga wala nay kapasilungan alang sa ilang pagkat-on.
