BUTUAN CITY – Gibana-banang mukabat sa 500-mil pesos ang damyos human gilamoy sa kalayo ang usa ka mercantile and residential building kaganinang buntag nga nga gipanag-iyahan ni Reynaldo Berol sa may Purok 13, Brgy. San Vicente ning siyudad sa Butuan.
Sigon ni OIC City Fire Marshall SFO4 Rodrigo Canton, wala’y nahipos sa iyang mga gamit og gitinda ang tag-iya kinsa bag-o lang nangumpra og apil sa nasunog ang duha ka mga motorsiklo nga giprenda lang kaniya.
Ang kadaan na sa electrical installation ilawom sa alkuba maoy gitu-uhang gigikanan sa mi-ulbong kalayo.
Tambag sa opisyal nga aron malikayan ang sunog, kinahanglang suhituhon ang gamitong electrical wiring og kini mahio pinaagi sa pagpasusi sa barangay electrician o kaha sa electrical engineer.
Kinahanglan usab nga susihon ang mga appliances aron ma-dispose na ang mga mi-abot na sa tulo ngadto sa lima ka tuig nga gamit.
Kinahanglang susihon usab ang mga lutu-anan sama sa LPG o kaha kadtong gigamitan og kahoy isip sugnod, dili padulaan sa mga bata ang mga lighters o kaha posporo og seguruhong nak-unplug ang tanang appliances higayong duna’y lakaw og wala’y mabilin sa balay apil na ang circuit breaker. (Beth Ruiz)
