BUTUAN CITY – Nagpabiling suspendido ang klase karong adlawa sa tanang ang-ang sa mga tunghaan ning siyudad sa Butuan human nga nakagawas na sa Caraga Region ang bagyong Auring.
Kini taliwa sa pangtangtang na ni Agusan del Norte Governor Ma. Angelica Rosedell Amante-Matba sa una niining gipagawas nga suspensyon unta sa klase apan alang lang sa mga magtutungha sa sekondarya og kolehiyo.
Sigon ni Paolo Gogo – information officer sa Butuan City Hall, wala na usab gipasulod sa ilang trabaho ang mga magtutudlo aron maseguro ang kaluwasan sa tanan gawas lang sa mga non-staff personnel.
Base usab sa latest monitoring sa Office of the Civil Defense Caraga, kadaghanan sa nabahaang national highways ning milabay’ng adlaw, maagi-an na human nga milurang na ang tubig-baha gawas lang sa tulo ka mga tulay sa Surigao del Sur nga na-washout partikular sa Zone III sa Lanuza ingon man sa Brgy. Salwang og Mahayag sa lungsod sa San Miguel.
Usa ka lane lang ang maagi-an karon sa Butuan City-Pianing Road tungod sa natalang rockslide kagahapon. (Beth Ruiz)
