BUTUAN CITY -Gikumpirma sa usa ka pumpboy sa gasolinahan ning siyudad sa Butuan nga katulo sila nagpasaka ug presyo sa produktong lana ning semanaha lang.
Sigon ni Crisanto Bacsan, usa ka Pump boy, nga dapat kausa ra sa usa ka semana molihok ang presyo apan tungod matud pa sa giyera sa gawas diin wala nay produkto nga muabot gikan sa gawas sa nasud maong nagkulang ang suplay o misunod ang sunod-sunod nga usbaw.
Una niini niadtong Martes diin ang Gasolina nga special misaka sa 73.90 pesos og pagkahuwebes misaka na usab ngadto sa 74.90 mpesos og karung adlawa miabot sa 75.90 pesos.
Ang Diesel usab niadtong Martes misaka sa 64.02 pesos og pagka-huwebes nahimong 64.95 pesos ug karung adlawa anaa sa 67/02 pesos.
Ang Unleaded usab misaka ngadto sa 63.95 pesos niadtong Martes og pagka-Huwebes miabot sa 64.95 pesos og karung adlawa misaka sa 65 pesos.
Gikumpirma usab sa Pump Boy nga magsirado na usab ang ilang kompanya tungod sa dili na makaya nga kamahal sa produktong lana samtang nihit kaayu ang suplay niini.
Sa iya matud pang nasayran kutob nalang karung Setyembre ning tuiga ang maong gasolinahan mag-abli.
Lakip sa hinungdan niini mao ang daghang mga baratu usab nga gasoline station nga muabot sa 10 pesos ang deperensiya.
Sa maong higayon, magtinda-tinda na lang matud pa siya aron duna gihapoy kapangetaan ilabina karung grabe kalisud ang kinabuhi. Dunay hangyu usab niini sa gobyerno nga tutukan ang nagkalisud nga mga Filipino dayung butyag nga kulang gayud ang serbisyu ngadto sa katawhan.
Gane, wala napug-ngan niini nga tawagong mga bagag nawong ang mga opisyales sa gobyerno nga na-busy lang sa pagpangorap.
