BUTUAN CITY – Padayon pa nga gipanubayan sa mga kapulisan sa syudad sa Bayugan ang nahitabong pagpamusil patay sa duha ka mga biktima kagahapon sa buntag.
Sa pakighinabi ning sibyahan, gibutyag ni PSupt. Romeo Villalobos, city director sa Bayugan City Police Office, nga nagpadayon pa ang ilang imbestigasyon mahitungod sa pagpusil-patay sa duha ka mga biktima nga naila nga sila Margarita Hipos-Bueno, 50-anyos, taga- Tanguile St. Brgy. Poblacion, Bayugan City ug Romeo Pascua Hermit, 49-anyos, taga- P1 Brgy. Taganahaw, Esperanza, Agusan del Sur.
Base sa imbestigasyon, nasayran nga samtang gisubay sa mga biktima ang dalan paingon sa lungsod sa Esperanza, ADS sakay ang usa ka single-motor, gisundan matud pa kini ug kalit nga gipamusil sa duha ka mga armadong lalake nga naka-riding in tandem usab sa laing single-motor nga wala’y plate number.
Matud pa nga adiser natigayon ang pagpusil ngadto sa babae, nag-inilogay pa una kini ngadto sa usa sa mga suspek sa bag nga gipanag-iyahan sa biktima.
Nakadawat ug multiple gunshot wounds ang duha ka mga biktima gikan sa gituohang caliber 45 nga pistola.
Gidala pa kini ngadto sa balay-tambalanan apan gideklara na kining dead-on-arrival sa attending physician.
Dugang pa niini nga usa matud pa ka buyer sa falcata ang lalaking biktima samtang tig-finance usab ang babae.
Natigayon ang kremin bandang alas- 9:05 ang takna sa buntag kagahapong adlawa didto sa may Brgy. Salvacion, Bayugan City.
