BUTUAN CITY – Balhog sa prisuhan ang usa ka tubero human kini gi-aresto atol sa implementasyon sa search arrant pasado alas 8:00 sa nakalabay nga gabii sa Purok-4 Brgy. Villa Kananga, Butuan City.
Naila ang nadakpan nga si Castro Aydaon Namit alyas “Don/Don-Don”, usa ka High Value Individual, 48-anyos, olitawo nga taga Purok-3, Kamunggay, Brgy. Maon, Butuan City.
Nakuha gikan sa posisyon sa suspek ang 8 ka sachet nga dunay sulod sa gitoohang shabu nga mitimbang og 3 gramos nga mobalor sa 2-mil 400 pesos lakip na ang nagkadaiyang mga illegal drug paraphernalias og cellphone nga duna usay cash.
Sa pakighinabi ning sibyahan kang Police Col. Marco Archenue, City Director sa Butuan City Police office. giangkon niini nga midaghan karun ang mga gumagamit sa ilegal nga drugas nga napamatud-an sa dinagko nga nakuha usab sa ilang mga operasyon.
Tungod niini, parayoridad nila karun ang mga dagkong player nga nagpalusot sa shabu aron dili na kini ma-distribute sa mga user ilabina kay daghan na usab ang mga magtutungha nga milambigit niini. Kini dayung panawagan sa tanan nga mohatag og impormasyon ngadto sa kapulisan may kalabutan sa aktibidad sa ilegal nga drogas.
