BUTUAN CITY – Gi-isa na sa Philippine Atmospheric, Geophysical and Astronomical, Services Administration kon PAGASA ang Tropical Cyclone Wind Signal No. 5 sa upat ka lugar human mikusog og samot ang bagyong Uwan ug nahimo nang super typhoon.
Base sa latest weather bulletin sa PAGASA, anaa sa ilawom sa Signal No. 5 ang Polillo Islands, Amihanang bahin sa Camarines Norte (Daet, Talisay, Paracale, Vinzons, Jose Panganiban, Mercedes, Basud); sidlakang bahin sa Camarines Sur (Siruma, Caramoan, Garchitorena, Tinambac, Lagonoy); ug Catanduanes.
Samtang signal No. 4 usab ang sidlakang bahin sa Quezon (Tagkawayan, Calauag, Guinayangan, Perez, Alabat, Quezon); nahabilin nga bahin sa Camarines Norte ug Camarines Sur; ug ang sidlakang bahin sa Albay (Rapu-Rapu, Bacacay, Tabaco City, Malilipot, Malinao, Tiwi, Polangui).
Signal No. 3 ang dakong bahin sa Luzon lakip ang Metro Manila, Cagayan Valley, Cordillera, Ilocos Region, Central Luzon, Calabarzon, Bicol Region, ug pipila ka bahin sa Eastern Visayas.
Signal No. 2 usab ang nahabiling bahin sa Cagayan, Ilocos Norte, Occidental ug Oriental Mindoro, Romblon, Masbate, Samar, Biliran, ug amihanang bahin sa Leyte ug signal No. 1 ang Batanes, Calamian ug Cuyo Islands, pipila ka bahin sa Visayas, Guimaras, Iloilo, Negros, Cebu, ug mga pulo sa Caraga Region.
Sumala sa PAGASA, katapusan nga naigpatan ang bagyong Uwan sa gilay-on nga 125 km sidlakan-amihanang sidlakan sa Virac, Catanduanes dala ang huros sa hangin nga mu-abot sa 185 km/h duol sa sentro ug buylo nga mu-abot sa 230 km/h, samtang naglihok kini pakasadpan-amihanang kasadpan sa kusog nga 25 km/h.
