BUTUAN CITY – Ang modernong kinabuhi puno sa stress—gikan sa trabaho, utang, ug komplikadong relasyon—apan kinsa bay magdahom nga makatabang ang yano nga pacifier kon tsupon?
Ang paggamit niini gipa-uso sa China kondiin dili lang mga batan-on kondili apil na ang daghang hamtong ang nahilig niini na usab niini dili lang sa China apan apil na sa ubang kanasuran. Dihang nag-trending ang paggamit sa mga batan-ong Intsik og tsupon bisan sa pampublikong lugar, misundog na usab niini ang ubang kanasuran ilabina kadtong na-stress na sa ilang lovelilfe, utang nga wala pa mabayran ug uban pang mga problema.
Kasagaran kini ibaligya aron makapamenos sa stress, kabalaka, o makatabang sa pagpangatulog, ug daghang tawo ang mupalit gilayon tungod sa nagkadaghan nang mga ads ug daghan na usab og baligya sa mga online stores, ug ang uban makabaligya ug libo kada bulan.
Sigon sa mga psychologists, ang pagsikat niini tungod sa regression phenomenon kon sobra ka-stress, hinungdan nga mamalik ang tawo sa batasan sa pagkabata, ug ang pacifier naghatag ug kahupayan ug kasigurohan.
Sumala sa usa ka report sa Sohu, daghan sa mga migamit niini ang nagbutyag nga naminosan ang ilang stress, natabangan sila sa pagtulog ug, ug nakapakalma pa. Apan, nagpasidaan ang mga eksperto nga ang dugay nga paggamit niini makadaot sa panglawas.
