BUTUAN CITY – Pasakahan na ni Senadora Risa Hontiveros og kaso sa National Bureau of Investigation (NBI), ugmang adlawa si Alyas ‘Rene’ — ang nibali nga testigo sa pagdungog kaniadto mahitungod sa pagpang-aabuso ni Pastor Apollo Quiboloy.
Kini human ning kuyanap sa social media ang video ni Alyas ‘Rene’ diin giakusahan niini ang senadora nga gibayran matud pa siya og P1 million arun mo testigo sa mga seryosong kaso kontra kang Quiboloy ug idawit pa sa kaso si kanhi Pangulong Rodrigo Duterte ingon man si Vice President Sara Duterte.
Gawas kang Alyas ‘Rene’ pasakahan usab sa Senadora og kaso ang nagpost sa maong video.
Sumala sa Senadora, dili lamang fake news ang maong video kun dili usa usab kini ka witness tampering o pagpanghadlok sa mga testigo.
Sumala pa ni Hontiveros, nga si si Alyas ‘Rene’ matud pa ang gabalik-balik og duol sa ilahang opisina—wala matud pa kini gihadlok o gipugos, apan si ‘Rene’ matud pa ang nag-apas sa ilahang buhatan arun ipagawas ang iyahang panig.
Dugang pa sa Senadora nga niadtung Pebrero 7, 2024, nangayo matud pa si Alyas ‘Rene’ kanila og kwarta pang-palit og laptop—apan klaro matud pa sa ilahang opisina nga ginadili ang paghatag og financial assistance ngadto sa mga potential witness.
Rason nga dili na matud pa ikatingala sa Senadora nga mismong ang Kingdom of Jesus Christ na ang mohatag kang ‘Rene’ og kwarta.
