BUTUAN CITY – Nagpagawas na og Temporary Restraining Order kon TRO ang Court of Appeals-Mindanao aron pug-ngan ang demolisyon nga gimandu ni Judge Marigel Dagani Hugo ngadto sa kabalayan sa may Barangay New Society Village ning siyudad sa Butuan.
Sa eksklusibong pakighinabi sa Bombo Radyo Butuan kang Atty. Berteni Cataluña Causing, legal counsel sa mga residente sa maong dapit, kaganinang hapon sa dihang nadawat nila ang kopya sa TRO.
Pasabot pa sa abogado, 60 ka adlaw nga epektibo ang maong TRO diin musunod niini ang pagdungog nga himoon didto sa Cagayan De Oro City aron hisgutan kung angayan bang ipadayun ang maong TRO hangtud nga mahuman ang kaso.
Kampante si Atty. Causing nga hingpit gyud nga mapug-ngan ang maong demolisyun ilabina kay lakip sa nakalatid sa TRO ang pag-mandu ngadto sa mga PLaza og sa RTC-Butuan nga mag-explain kung nganung dili maghatag og writ of preliminary injunction ang korte.
Tungod sa nasangpit nga kalambuan, hilabihan ang pagpasalamat sa abogado ngadto sa Ginoo.
Samtang gikalipay usab kini sa mga hingtungdang residente.
Sumala pa ni Barangay Kagawad Faustino Gambin, dako ang ilang pasalamat nga sa kadugay na sa ilang paningkamot, nadawat na gyud nila ang maong TRO rason nga luwas na gikan demolisyon ang 141 ka mga petitioners kinsa gimanduang makahatag og bond nga muabot sa 500-mil ka pesos.
Pagbutyag sa niini nga magpahigayon pa og pulong ang United New Society Village Homeowners Association alang sa maong hisgutanan.
Kagawad George Halohalo, gipahayag niining kampante na karun ang katawhan sa ilang barangay nga wala nay matigayong demolisyon.
