BUTUAN CITY – Mahinungdanong lakang alang sa Butuan City Transportation and Traffic Management Department kon Butuan CTTMD ang hingpit nang pagkahimong balaud sa gihingusgan nilang tricycle route plan human ang taas-taas nga proseso ug teknikal nga pagsusi niini.
Sigon ni CTTMD head Ma Kristina Cassion, karon lang tuiga na-institutionalize ang maong plano human nga gi-aprubahan ang City Ordinance No. 7220-2025 ug napirmahan na sa buhatan sa mayor.
Sa eksklusibong pakighinabi ning sibyahan, gibutyag ni Cassion nga importante kini sa padayong paglambo ning siyudad isip sentro usab sa Caraga Region ilabina nga dako ang papel sa public transportation diha sa pagsuporta sa kalambuan ning siyudad.
Kinahanglan matud pa kini ilabina kung gusto natong tanan nga mahimong competitive ang siyudad, sa ubang siyudad sa nasud ug alang usab sa malahutayong paglambo niini.
Dugang ni Cassion, ang nasangpit nga route plan kabahin sa ilang tricycle modernization program kansa usa lang sa mga components sa route rationalization.
Ang maong plano maghatag og sistematiko ug organisadong ruta alang sa mga tricycle, usa ka importante nga aspeto aron masiguro ang pag-uswag sa syudad.
