BUTUAN CITY – Tungod sa walay kabutangan nga kalipay human nipasar ang iyang asawa sa March 2023 Licensure Examination for Teachers, naghatag og libreng sakay sugod niadtong Lunes hangtud sa Martes, ang tricycle driver ning siyudad sa Butuan nga si Reynante Ardines isip dakong pasalamat sa Ginoo.
Sa eksklusibong pakighinabi sa Bombo Radyo Butuan, gipadayag ni Reynante nga gidamgo gayud niyang mapahuman ang iyang asawa sa kurso nga gikuha niini kaniadto rason nga nagdoble kayod siya sa pagpamasahero aron sila mabuhi kauban ang ilang duha ka mga anak.
Saysay pa niini nga niadtong nagtungha pa ang iyang asawang si Shiela, kinahanglan niyang mumata og alas 3:00 sa kaadlawon aron mamasada na og mudako-dako ang kita kondiin mupa-uli usab siya pagka-alas 6:00 sa buntag aron ihatud ang iyang mga anak sa tunghaan.
Samtang gisaysay usab sa asawa niining si Shiela nga dili sayon ang pag-budget sa oras niadtong kini nagtungha pa ug duna pay higayon nga kinahanglan niyang dalhon sa eskwelahan ang iyang mga anak.
Kinahanglan usab ang dakong pagsinabtanay og pagtinabangay nilang magti-ayon dungan sa pagpasalamat sa libreng edukasyon sa gobyerno rasong nakatungha kini sa upat ka tuig nga kurso.
Tambag na lang niini sa uban nga dili magduha-duha sa pagsalig sa Ginoo kay kung para kini sa imuha, ihatag gayud kini.
