BUTUAN CITY – Gireklamo na usab sa pipila ka mga residente sa Purok 1-A ug Purok 5-B sa Brgy. Pinamanculan ning siyudad sa Butuan ang Tribong Lapaknon ni Eddie Asaytuna tungod sa pagpataka na usab nila og angkon og yuta.
Nasayrang base sa reklamo sa mga residente, mukabat sa 25-ektaryang luna ang gi-angkon sa nagpa-ilang tribo taliwa nga duna na sila’y certificate of land ownership award kon CLOA human gihatag sa gobyerno ang parte sa yutang ilang gitikad ubos sa programang gipatuman sa Department of Agrarian Reform.
Sigon sa usa sa mga reklamante, sila pa ang gipatawag sa mga Lapaknon kagahapon sa ilang barangay hall tungod kay trespassing matud pa ang ilang gihimo rason nga gireklamo sila og harassment sa rasong peke matud pa ang ilang gikuptang dokumento.
Ila na matud pa kining gipa-abot nadto sa Butuan City Police Station 3 apan wala kini aksyuni sa rasong daghan na matud pang mga kaso ang gipasaka batuk sa maong grupo ug gipa-abot na usab nila kini ngadto sa Provincial Agrarian Reform Office kon PARO kinsa maoy mipasalig kanilang dili makuha ang maong yuta.
