BUTUAN CITY – Gipaningkamutan pang makuha ang patay’ng lawas sa usa ka tribal chieftain kon Datu nga gipusil-patay didto sa bukirang bahin sa Sitio Liyanggabon, Barangay Calatngan, lungsod sa San Miguel, Surigao Del Sur kaganinang hapon.
Giila ni Datu Rico Makan, Municipal Tribal Chieftain sa maong lungsod ang biktimang si Dato Bobong Elizalde, usa ka manobo, menyu ug dunay mga anak.
Sumala pa ni Datu Makan, mga 20 kilometros gikan sa sentrong bahin sa barangay ang kalay-on sa umahan sa biktima diin kini gipusil atubangan sa iyang mga anak. Kini ang rasong lisud ang pagpakanaog sa patay’ng lawas niini.
Gibutyag usab sa Datu, nga kanhe miyembro sa rebeldeng New People’s Army kon NPA ang biktima diin aktibo kining nagsuporta sa TRIPPS, ang tunghaan nga gipangusgan sa rebelde.
Apan tungod sa tinguhang ma-edukar ang mga kaigsoonang Manobo, mas gisuportahan na sa biktima ang IP School nga gitawag og School of Living Tradition nga dunay permit sa Department of Education kon DepEd.
Kini ang rason nganung dako ang pagtoo ni Datu Makan nga ang walhong grupo ang mihunos sa kinabuhi sa biktima.
Ugaling kini tinood matud pa, gi-awhag niini ang NPA nga magpagawas ug press release aron masayran usab nila kung unsay mga rason kung nganung gipatay nila kini.
Samtang hugot nga gikondena usab niini ang panghitabo dungan sa panawagang dili kini pasagdan sa gobyerno og mahatagan ug hustisya ang nadatangan ni Datu Bobong.
Kini ilabina kay na-trauma karun ang mga batang nakasaksi sa pagpusil sa ilang amahan.
