BUTUAN CITY – Gikan sa gi-isang storm signal No. 8 sa Central Hong Kong tungod sa bagyong Wipha, milurang na kini kagahapon sa buntag hangtud nga karon anaa na lang sa signal ano. 3 ilabina sa central region nga New Territories.
Sa eksklusibong pakighinabi sa Bombo Radyo Butuan, gibutyag ni Bombo international correspondent Merly Bunda direkta gikan sa Hong Kong, nga ning mi-aging hapon pa ang round-the-clock nga pagpahibalo sa mga otoridad sa gi-isang signal number 8 kansa milurang ngadto sa signal number 6 kagahapon sa buntag hangtud nga mi-abot na kini karon sa pinaka-ubos nga signal number 3.
Apan taliwa niini, ngitngit pa gihapon ang ilang palibot tungod sa bagang dag-um og pag-ulan. Sa pagkakaron, wala pa’y gikatahong duna’y gibilin nga damyos ang kusog nga bagyo nga inanay nang migawas sa ilang area of responsibility.
Human ang kanselasyon sa mga biyahe sa bus, taksi og bisan na sa eroplano, balik na karon sa normal ang tanan.
Giklaro usab niini nga kini ang unang bagyong misulod sa maong isla apan mas hinay kini kumpara sa signal number 10 nga natala niadtong Oktubre ning mi-aging tuig.
Bisan pa man, gimanduan gihapon silang tanan sa mga otoridad nga likayan una ang water sports tungod kay delikado pa ilabina nga dagko pa ang balud sa kadagatan.
