BUTUAN CITY – Dismayado ang mga transport groups ning siyudad sa Butuan tungod sa padayong pagsaka sa presyo sa mga produktong petrolyo ug hangtud karon wala pa gihapon gihatag sa lokal nga kagamhanan ang gisaad kanilang 2-mil pisos nga fuel subsidy apil na ang 5-mil pisos nga ayuda usab sa nasudnong kagamhanan nga gipaagi sa Department of Social Welfare and Development kon DSWD.
Sigon ni Reynaldo Deita, ang chairman sa Libertad White Transport Cooperative kon LWTC, posibleng sunod semana pa mahatag ang maong subsidiya sa lokal nga kagamhanan tungod kay dihang ila kining gi-follow up kagahapon, wala pa sila’y nakuhang update bisan og gipakita na sila sa listahan sa mga kwalipikadong makadawat niini.
Kung sunod semana pa nila kini madawat, daw wala na usa’y bili ang fuel voucher tungod kay duna naman usa’y laing hugna sa pagsaka sa presyo sa mga produktong petrolyo.
Kini nga sitwasyon naghatag matud pa og kahasol kanilang mga drivers ilabina niadtong gustong mu-relax una sa mahal nga mga adlaw uban sa pamilya.
Kini tungod kay kinahanglan nga pipila kanila ang mupasada gayod aron maserbisyuhan ang mga sumasakay niini nga mga adlaw.
Giklaro usab sa opisyal nga bisan pa man sa wala’y hunong nga pagsaka sa presyo sa gasolina, wala pa siya’y gitugutan nilang mga membro nga magpasaka sa plitehan samtang gipa-abot pa ang subsidiya.
