BUTUAN CITY – Nagbahad ang mga transport groups nga maglusad sila og lapad nga transport strike kung dili gihapon resolbahon sa kagamhanan ang ilang mga yangungo.
Sigon ni Liga ng Transportasyon at Operasyon sa Pilipinas President Orlando Marquez, makigtagbo sial sa nagkada-iyang transport groups alang sa maong katuyuan ilabina nga gisuspende ang fare hike.
Gibutyag sa grupo nga maghulat una sila hangtud ugma sa udto aron masayran kung unsa ang tubag sa gobyerno sa ilang mga yangungo ug kung wala’y makuhang kongkretong lakang, dinhi na sila magtakda og lapad nga transport strike.
Nasayrang gipadayon ning adlawa ang transport strike nga gipangunahan sa grupong Pagkakaisa ng mga Samahan ng Tsuper at Opereytor Nationwide kon PISTON tungod sa padayong pagsaka sa presyo sa mga produktong petrolyo tungod sa giyera sa Middle East.
Sigon sa grupo, mi-abot matud pa sa 90-porsiento sa mga kalsada sa Metro Manila ang na-apektuhan sa ilang hunong-pasada nga nagsugod kagahapon.
Apan sigon sa Metro Manila Development Authority kon MMDA, nagpabiling normal ang dagan sa trapiko ug wala’y na-stranded nga mga pasahero ilabina nga naghatag og libreng sakay ang mga lokal nga kagamhanan.
Sa pagbana-bana sa PISTON, kung anaa na sa 120-pisos ang presyo sa kada-litro sa krudo, mu-abot usab sa 3,600-pisos ang inadlaw nga gasto sa matag-jeepney driver.
Dili usab matud pa igo ang unta piso ngadto sa dos-pisos nga usbaw sa pamasahe kansa wala madayon human gipasuspende ni Pangulong Bongbong Marcos.
Gipamugos usab ni PISTON National President Eli Villena, gamay ra kaayo ang unta umento sa pamasahe kumpara sa grabe kataas sa pagsaka sa presyo sa mga produktong petrolyo. Plano sa PISTON nga magmartsa hangtud sa Mendiola aron ipaabot ang ilang mga yangungo ngadto sa Malakanyang.
