BUTUAN CITY – Padayon karung gi-imbestigahan ang nahitabong pagkawat sa usa ka transformer samtang kini nagbitay pa sa poste sa nakalabay nga gabii sa may Purok-1, Barangay Bitan-agan lungsod sa San Francisco Agusan Del Sur.
Gisaysay ni Pedro campos, Agusan Del Sur Electric Cooperative kon ASELCO Unit Head Maintenance nga nakadawat silang taho mahitungod sa pagkapalong sa linya sa kuryente nga ilang gitoohang lose connection lang og pagka-sabado na sa buntag nila gi-adtu og gisusi.
Sumala pa niini, nga sa ilang pagsusi sa poste, wala na ang nagbitay nga transformer diin ang nabilin lang mao ang jumper.
Nakita usab didto ang pisi og lukma sa transformer nga timaan sa pagkahulog niini.
Tungod kay wala sa palibot ang maong transformer, segurado si Campos nga gisakay kini sa sakyanan tungod kay mga 4 ka tawo man ang kinahanglang mag-alsa niini.
Sumala pa ni Campos nga eksperto kaayu ang nagkawat niini dayung butyag nga posibleng mga line man ra gihapon tungod kay delikado kaayu ang maong pagkawat sa transformer nga naa pa sa poste.
Ugaling ibaligya nila ang nakawat nga transformer, anaa kini sa kantidad nga 160-mil pesos apan kung ilang bungkagon og kuhaon lang ang bronze, mokita sila og mga 16-mil pesos.
Nasayrang layu sa balay ang maong poste og mga 10 lang ka bobong ang nasuplayan niini tungod kay bag-o pa gi-ablihan ang maong lugar.
