BUTUAN CITY- Minglusad ang China og duha ka imbestigasyon batok sa trade practices sa Estados Unidos isip tubag sa umalabot nga pagbisita ni U.S. President Donald Trump sa Mayo.
Sumala sa Ministry of Commerce sa China, kini nga mga lakang gituyo aron maprotektahan ang interes sa lokal nga industriya ug ingon man tubag sa mga taripa nga gipahamtang sa Amerika.
Ang unang imbestigasyon nagpukos sa mga polisiya sa U.S. kansa naglimitar sa pagpasulod og mga produkto sa China ug sa pag-export sa advanced technology, samtang ang ikaduha nakapokus sa mga babag sa pag-export sa green energy products.
Gilauman nga molungtad kini og unom ka bulan ug mahimong mapalawig hangtod siyam ka bulan.
Kini nga kalihukan giisip nga bag-ong yugto sa dugay nang trade war tali sa duha ka nasod ug mahimong gamiton sa Beijing isip bargaining tool batok sa posibleng bag-ong taripa sa Amerika, diin makahatag og dako nga epekto sa kalig-on sa ilang relasyong pang-ekonomiya.
