BUTUAN CITY – Gisuspende sugod ning ala-una sa hapon ni Mayor Jose Cuyos Sr. sa lungsod sa Rosario, Agusan del Sur, ang trabaho sa tanang local ug national agencies tungod sa mga pagbaha nga hatud sa padayong pag-ulan tungod sa shearline.
Base na usab kini sa gipagawas nga heavy rainfall warning kaganinang alas-11:00 sa buntag kondiin makasinati matud pa og igo-igo ngadto sa kusog nga pagbundak sa ulan ang maong lungsod sulod sa duha ngadto sa tulo ka mga oras nga makapasamot pagtaas sa water level sa Solibao River nga anaa na karon sa critical level rason nga gipatuman na ang red warning.
Pinaagi niini, mahatagan og igong oras ang mga empleyado sa munisipyo nga makapangandam sa mga posibleng mahitabo tungod sa padayong pag-ulan. Apan giklaro sa memorandum order ni Mayor Cuyos nga kadtong mga buhatan nga nalambigit sa delivery sa mga basic services, magpadayon gihapon sa ilang operasyon.
