BUTUAN CITY – Nasaksihan sa mga Caraganons ang total lunar eclipse nga nahitabo sugod alas-5:29 sa sayong kagabhi-on kagabii ug natapos sa alas-7:57 sa gabii.
Sumala ni Jill Galicha, weather specialist sa Philippine Atmospheric, Geophysical and Astronomical Services Administration kon PAGASA-Hinatuan, usa ka normal phenomenon ang lunar eclipse og wala kini angayang ikabalaka.
Sigon pa niini, ang rehiyon sa Caraga ang unang makakita sa maong lunar eclipse tungod kay anaa kini sa sidlakan apan na-atol lang nga sa siyudad sa Butuan nakasinati kini og pag-ulan og pagpangilat rasong wala gelayon nakita ang partial lunar eclipse.
Hinoon bandang alas 7:00 kagabii naka-apas pa ang mga Butuanons sa pulang bulan.
Pasabot pa ni Galicha nga ang lunar eclipse mao ang senaryo nga ang kahayag nga makuha sa buwan gikan sa adlaw natabunan sa kalibutan og ang anino sa maong kahayag maoy hinungdan nga pula kung lantawon ang bulan.
Gibutyag usab niini nga sunod tuig dunay makitang lunar eclipse apan kini partial lang nga matigayon sa bulan sa Mayo samtang penumbral usab sa buwan sa Oktubre.
Giklaro usab ni Galicha nga walay kamatooran ang tinoohan sa katigulangan kaniadto nga makadaot sa mga mabdos ang lunar eclipse.
