BUTUAN CITY – Gipadayag ni Ombudsman Jesus Crispin ‘Boying’ Remulla nga lakip si kanhi House Speaker Martin Romualdez sa mga patubagon kalabot sa flood control projects anomaly.
Dili matud pa maka-ipsot sa tulobagon ang Leyte 1st District representative kalabot sa isyu sa korapsyon.
Sigon ni Romulla, ang pagka-speaker of the house ni Romualdez mao ang nakit-ang hinungdan aron manubag sa pagkatudlo ni kanhi Ako Bicol Party-list Rep. Zaldy Co isip House Appropriations Committee chair.
Kini subay sa gipahigayong imbestigasyon sa Office of the Ombudsman sa nahimong papel sa kanhi magbabalaod sa anomalosong mga proyekto.
Tungod niini, gipaniguro ni Ombudsman Remulla, nga muhimo sila og mga dugang lakang aron masuta ang tibuok kamatuoran sa flood control scandal. Wala matud pa’y makalusot ilabina sa mga lider o opisyal sa gobyerno sa ilang kalambigitan sa korapsyon.
Kini ang rason nga posibleng atubangon ni kanhi House Speaker Martin Romualdez ang kasong gross inexcusable negligence ugaling masuta ang tulobagon niini.
Samtang, gipa-ambit usab sa kasamtangang Ombudsman, nga nagpadayon gihapon ang ilang imbestigasyon kalabot sa pagkalambigit ni Sen. Chiz Escudero sa anomalusong mga proyekto.
Gisundan matud pa ang nakuha nga money trail kansa posibleng mahimong dalan aron masuta ang pagkalambigit sa senador.
